Baat Karni Mujhe Mushkil Kabhi Aisi To Na Thi

Baat karni mujhe mushkil kabhi aisii to na thi
Jaisi ab hai teri mehfil kabhi aisii to na thi

Le gayaa chheen ke kaun aaj tera sabr-O-qaraar
Be-Qaraari tujhe ai dil kabhi aisii to na thi

Us kii aaNkhoN ne KHudaa jaane kiya kya jaadu
K tabi’at meri maa’il  kabhi aisii to na thi

Aks-E-ruKHsaar ne kis ke hai tujhe chamkaayaa
Taab tujh meiN mah-E-kaamil kabhi aisii to na thi

Ab ki jo raah-E-muhabbat meiN uThaayi takliif
Sakht hoti hameN manzil kabhi aisii to na thi

Paa-E-kubaaN koi zindaaN meN naya hai majnuN
Aatii aavaaz-E-salaasil kabhi aisii to na thi

Nigah-E-yaar ko ab kyuuN hai taGaaful ae dil
Wo tere haal se Ghaafil kabhi aisii to na thi

Chashm-E-qaatil meri dushman thii hamesha lekin
Jaisii ab ho gayi qaatil kabhi aisii to na thi

Kyaa sabab tu jo bigaDta hai ‘Zafar’ se har bar
Khoo teri huur-shamaail kabhii aisii to na thi

(Bahadur Shah Zafar)

Dekh To Dil K Jaan Se Uthta Hai

Dekh to dil K jaaN se uTh-ta hai
Ye dhuaaN sa kahaaN se uTh-ta hai

Gor kis dil-jale ki hai ye falak
Sho’la ek subh yaaN se uTh-ta hai

BaiThne kaun de hai phir usko
Jo tere aastaaN se uTh-ta hai

YuN uThe aaah! us gali se hum
Jaise koi jahaaN se uTh-ta hai

Khaana-E-dil se zeenhaar na jaa
Koi aise makaaN se uTh-ta hai

Naalaa sar kheeNchta hai jab mera
Shor k aasmaaN se uTh-ta hai

Ishq ek ‘Meer’ bhaari patthar hai
Kab ye tujh naatawaaN se uTh-ta hai

(Mir Taqi Mir)

Khabar E Tahayyur E Ishq Sun, Na JunooN Rahaa, Na Parii Rahi

خبرِ تحیرِ عشق سن، نہ جنوں رہا، نہ پری رہی
نہ تو تُو رہا، نہ تو میں رہا، جو رہی سو بے خبری رہی

شۂہ بے خودی نے عطا کیا، مجھے اب لباسِ برہنگی
نہ خرد کی بخیہ گری رہی، نہ جنوں کی پردہ دری رہی

چلی سمتِ غیب سے اک ہوا کہ چمن ظہور کا جل گیا
مگر ایک شاخِ نہالِ غم جسے دل کہیں سو ہری رہی

نظرِ تغافلِ یار کا گلہ کس زباں سے کروں بیاں
کہ شرابِ حسرت و آرزو، خمِ دل میں تھی سو بھری رہی

وہ عجب گھڑی تھی کہ جس گھڑی لیا درس نسخۂ عشق کا
کہ کتاب عقل کی طاق پر جو دھری تھی سو وہ دھری رہی

ترے جوشِ حیرتِ حسن کا اثر اس قدر ہے یہاں ہوا
کہ نہ آئینے میں جِلا رہی، نہ پری میں جلوہ گری رہی

کیا خاک آتشِ عشق نے دلِ بے نوائے سراج کو
نہ خطر رہا، نہ حذر رہا، جو رہی سو بے خطری رہی

سراج اورنگ آبادی

Khabar E tahayyur E ishq sun, na junooN rahaa, na parii rahii

Na to tuu rahaa, na to maiN rahaa, jo rahii so beKhabarii rahii

Shah E beKhudii ne ataa kiyaa mujhe ab libaas E barahnagii

Na Khirad kii bakhiyaagari rahii, na junooN kii pardadarii rahii

Chali simt E Ghaib se kya hava K chaman zahoor kaa jal gaya

Magar ek shaaKh E nihaal E Gham jise dil kaho so harii rahii

Voh ajab ghaRi thi maiN jis ghaRi liya dars nuskha E ishq ka

K kitaab aql kii taaq meN jooN dharii thii tyuuN dharii rahii

Nazr E taGhaaful E yaar kaa gila kis zubaaN se bayaaN karuN

K sharab E sad qadah E aarzu khum E dil meN thi so bhari rahii

Tere josh E hairat E husn ka asar is qadar se yahaN hua

K na aayiine meN rahii jilaa, na parii ko jalvagarii rahii

Kiyaa Khaak aatish E ishq ne dil E benavaa E Siraj ko

Na Khatar raha, na hazar raha, magar ek beKhatarii rahii

(Siraj Aurangabadi)

Sarfroshi Ki Tamanna Ab Hamaare Dil MeN Hai …

Sarfroshi ki tamanna ab hamare dil meN hai
Dekhna hai zor kitna baazu E Qatil meN hai


Ae shahid E mulk O millat, maiN tere uper nisaar
Ab teri himmat ka charcha Ghair ki mahfil meN hai


Rah rav E raah E muhabbat, rah na jaana raah meN
Lazzat E sehra navardi doori E manzil meN hai


Aaj phir maQtal meN Qatil kah raha hai baar baar
AayeN woh shauQ E shahadat jinke jinke dil meN hai


Marne walo  aao ab gardan kataao shauQ se
Yeh Ghaneemat waqt hai, khanjar kaf E Qaatil meN hai


Waqt aane par dikhadeNge tujhe ae aasmaaN
Hum abhi se kyuN batayeN kya hamare dil meN hai


Ab na agle walwale haiN aur na woh armaan ki bheeR
Sirf mit jaane ki hasrat ek dil E bismal meN hai


*****************

Syed Shah Muhammad Hasan,
Bismil Azeem Aabaadi
1900 – 20 june 1978

Khaatir se ya Lihaaz se …

Khaatir se ya lihaaz se maiN maan to gayaa
JhooTi Qasam se aap ka eemaan to gayaa

Dil leke muft kahte haiN kuch kaam ka nahiN
UlTi shikaayateiN rahiN ehsaan to gayaa

Afshaay E raaz E ishq me go zillataiN huiN
Lekin use jataa to diya, jaan to gayaa

Dekha hai butkade meN jo ae sheikh kuch na kuch
Eemaan ki to ye hai k eemaan to gayaa

Darta hooN dekh kar dil E be-aarzu ko maiN
Sunsaan ghar ye kyuN na ho mehmaan to gayaa

Go naamaabar se khush na hua par hazaar shukr
Mujhko wo mere naam se pahchaan to gayaa

Hosh O hawaas O taab O tavaaN “Daag” ja chuke
Ab hum bhi jaane waale haiN saamaan to gayaa

[Daagh Dehlavi]