Gaye Baras Ki Eid Ka Din …

Gaye baras ki eid ka din kya achchha tha

ChaaNd ko dekh ke uskaa chehra dekha tha

Feza mein ‘Keats’ ke lehje ki nermahat thi

Mausam apne rang mein ‘Faiz’ ka misraa tha

Duaa ke be-aawaaz, uloohi lamhoN mein

Woh lamhaa bhi kitna dilkashh lamha tha

Hath uTha ker jab aNkhoN hi aNkhoN mein

Us ne mujh ko apne Rab se maaNgaa tha

Phir mere chehre ko haathoN mein le ker

Kitne pyar se mera maatha chooma tha!

Hawa! kuch aj ki shab ka tu ahwaal suna

Kya woh apni chhat per aaj akela tha?

Ya koi mere jeisi saath thi, aur uss ne

Chand ko dekh ke us ka chehra dekhaa tha?

(Parveen Shakir)

Wahshat E JaaN Ki Pazeeraayi Na Kar Paayega Tu

Wahshat e jaaN ki pazeeraayi na kar paayega tu
Khud ko itnaa kabhi sahraayi na kar paayega tu

HaNstaa gaata hua ik shahr hai mujhmeiN maujood
Mere atraaf meiN tanhaayi na kar paayegaa tu

Mujhko dekhegaa baharhaal junooN karte hue
HaaN meri hauslaa-afzaayi na kar paayega tu

Abke lagta hai K beemaar huN maiN sach-much ka
Abke lagtaa hai maseehaayi na kar paayega tu

AaRay aa jaayegii har baar meri naadaani
Mere aage koi daanaayi na kar paayega tu

Khair duniyaa ka bhalaa tujhse kahaaN mumkin hai
Aur mere saath bhi acchaayi na kar paayega tu

MaiN wo patthar huN K jismeiN koi taaseer nahiN
Mukhtasar ye K jabeeNsaayi na kar paayega tu

Ab to har dasht meri zaat ka partau hai yahaaN
Is se badhkar mujhe saudaayi na kar paayega tu

Tujhse mansoob haiN ash’aar kuchh aise bhi mere
Ghaaliban jinki pazeeraayi na kar paayega tu

(Abhishek Shukla)

Tere Tan Ke Bahut Rang HaiN Jaan-E-Man

 

Tere tan ke bahut rang haiN jaan-e-man, aur nihaaN dil ke nairang-KhanoN meiN haiN!
Laamsaah, Shaammah, Zaaiqaah, Saameaah, Baasraah sab mire raaz daanoN meiN haiN!!
Aur kuChh daaman-e-dil kushaadah karo! dosto, shukr-e-n’emat ziyaadaa karo!
PeR, dariya, hava, raushni, aurteN, KhushbueN sab Khuda ke KhazaanoN meiN haiN!!
Naaqa-e-husn kii ham rakaabii kahaaN ?! Khaima-e-naaz meiN baraayaabii kahaaN?!
Ham to ai baano-e-kishwar-e-dilbari, paasdaaroN meiN haiN! saarbaanoN meiN haiN!!
Mere andar bhii hai ek shehar-e-digar, mere mehtaab ik raat idher se guzar!
Kaise kaise chiraagh in dariichoN meiN haiN! kaise kaise qamar in makaanoN meiN haiN!
Ik sitaarah ada ne yeh kya kar diya?! merii miTTi se mujh ko juda kar diya!
In dinoN paaoN mere zamiiN par nahiiN, ab miri manzileN aasmaanoN meiN haiN!
(Irfan Siddiqui)

Qurb E Jaanan Ka Na Maikhaane Ka Mausam Aaya

Qurb-e-jaanaN ka na maikhaane ka mausam aaya
Phir se  be-sarfaa ujaR jaane ka mausam aaya

Kunj-e-Ghurbat meN kabhi gosha-e-zandan meN the hum
Jaan-e-jaaN jab bhi tere aane ka mausam aaya

Ab lahu rone ki khaahish, na lahu hone ki
Dil-e-zinda tere marjaane ka mausam aaya

Koocha-e-yaar se har fasal mein guzre hain magar
Shaayad ab jaaN se guzar jaane ka mausam aaya

Koi zanjeer koi harf-e-khirad le aaya
Fasal-e-gul aayi k diivaane ka mausam aaya

Sail-e-khuN shahr ki galiyoN meN dar aya hai Faraz
Aur too khush hai K ghar jaane ka mausam aaya

(Ahmed Faraz – Pas Andaz Mausam)

Tujhe Kho Kar Bhi Tujhe Paaun

Tujhe kho kar bhi tujhe paauN, jahaaN tak dekhuN

Husn-E-yezdaaN se tujhe husn-E-butaaN tak dekhuN

Tu ne yuN dekha hai jaise kabhi dekhaa hi na tha

Main to dil mein tere QadmoN ke nishaaN tak dekhuN

Faqat is shouq mein poochhi haiN hazaaroN baateiN

MaiN tera husn,  tere husn-E-bayaaN tak dekhuN

Mere veeraana-E-jaaN meiN tere Gham ke dam se

Phool khilte nazar aate haiN jahaaN tak dekhuN

Waqt ne zehn mein dhundhla diye tere khad-O-Khaal

YuN to maiN TooT-te taaroN ka dhuaaN tak dekhuN

Dil gaya tha to yeh aaNkheiN bhi koi le jaataa

MaiN faqat aek hi tasveer kahaaN tak dekhuN

Ek haQeeQat sahi firdous meiN hooroN ka wajood

Husn-E-insaaN se nimaT luN to wahaaN tak dekhuN

(Extracted from ‘Moheet’ by Ahmed Nadeem Qasmi)

Sookhe Pokhar, Banjar Dharti, Neer Bhaye Ban Chhaon

Sookhe pokhar, banjar dharti, neer bhaye ban-chhaoN

MiTTi miTTi lagta  hai ab  soona – soona gaaoN

Kutte jaise haaNp rahe hain piichhe piichhe log

Aage al-lhaR si ek laRki, Jeevan jis ka naaoN*

ShahroN ke andaaz kahaaN sah paayega dehaat

Gili kachchi pagdandi par, mat rakhiyega paaoN

Gori rangat,  kaali zulfeiN, teekhay sab aakaar

Uska sab kuchh yad hai mujhko, bhuluN apna naaoN

Mamta ka dhan baaNT rahi hai saari kachli naar

Gobar-gobar haath haiN jiske, kichaR-kichhaR paaoN

SaaNjh bhayii, sab revaR pahunche apne apne Thor

Ek ‘Badnam’ phire aawaara, jis ka ghar na gaaoN

(By: Badnam Nazar)

*naaoN = Name

Jaisa HuN Vaisa KyuN HuN…

Jaisa huN vaisa kyuN huN samjha sakta tha maiN

Tum ne poochha to hota, batlaa sakta tha maiN

Aasoodaa rahne ki Khaahish maar gayii varnaa

Aagay aur bahut aage tak jaa sakta tha maiN

ChhoTii moTii ek lahar hii thii mere andar

Ek lahar se kyaa toofaan uThaa sakta tha maiN

KahiN-kahiN se kuchh misre, ek aadh Gazal, kuchh sher

Is pooNjii par kitnaa shor machaa sakta tha maiN

Jaise sab likhte rahte haiN GazleN, nazmeN, geet

Vaise likh likh kar ambaar lagaa sakta tha maiN

(Iftekhar Arif)